ಪ್ರೇಕ್ಷಕರ ಮನಸೂರೆಗೊಂಡ ಸ್ಥಳೀಯ ಕಲಾವಿದರ ತಿಲಕ್ ಚೌಕ್ ರಸಂಮಜರಿ ಸ್ಥಳೀಯ ಕಲಾವಿದರಿಂದ ಸಂಗೀತ ರಸಮಂಜರಿ ಯಶಸ್ವಿ: ದರ್ಶನ್ ಬಿಡಿಕರ್ ಮತ್ತು ಯೋಗೇಶ ಹಿರೇಮಠ ಸ್ಮರಣೆ ವರದಿ : ಜಗದೀಶ‌ ನಾಯಕ

ಯಲ್ಲಾಪುರ: ತಿಲಕ್ ಚೌಕ ಗಜಾನನೋತ್ಸವ ಸಮಿತಿ ಸೆಪ್ಟೆಂಬರ್ 14ರಂದು ಅಕಾಲಿಕವಾಗಿ ಅಗಲಿದ ಸಮಿತಿಯ ಕ್ರೀಯಾಶೀಲ ಸದಸ್ಯರಾದ ದಿ. ದರ್ಶನ್ ಬಿಡಿಕರ್ ಮತ್ತು ದಿ. ಯೋಗೇಶ ಹಿರೇಮಠ ಅವರ ಸ್ಮರಣಾರ್ಥ ಸ್ಥಳೀಯ ಕಲಾವಿದರಿಂದ ಹಮ್ಮಿಕೊಂಡ ಸಂಗೀತ ರಸಮಂಜರಿ ಕಾರ್ಯಕ್ರಮವು ಯಶಸ್ವಿಯಾಯಿತು. ಸ್ಥಳೀಯ ಕಲಾವಿದರಾದ ಚಂದ್ರು ಆಚಾರಿ (ಯಲ್ಲಾಪುರ) "ಗಣೇಶ ಸ್ತುತಿ", "ನನ್ನ ಗೆಳತಿ", "ಕನಸುಗಾರ" ಚಿತ್ರದ ಎಲ್ಲೊ ಅದು ಎಲ್ಲೊ ಹಾಡುಗಳನ್ನು ಪ್ರಸ್ತುತಪಡಿಸಿದರು. ಗುರು ಗಜಾನನ ನಾಯ್ಕ ಅವರು "ಚಲಿಸುವ ನೋಡಗಳು" ಚಿತ್ರದ ಜೇನಿನ ಹೊಳೆಯೋ ಮತ್ತು "ಪಾವನಗಂಗಾ" ಚಿತ್ರದ ಆಕಾಶ ದೀಪವು ನೀನು ಹಾಡುಗಳ ಮೂಲಕ ಕಲಾತ್ಮಕತೆ ಮೆರೆದರು. ಗೀತಾ ನಾಯ್ಕ ಅವರ "ಗಾಳಿಮಾತು" ಚಿತ್ರದ ಒಮ್ಮೆ ನಿನ್ನನ್ನು ಕಣ್ತುಂಬ ಕಾಣುವ ಆಸೆ ಹಾಡು ಪ್ರೇಕ್ಷಕರ ಮನಸೂರೆಗೊಂಡಿತು. ದತ್ತಾ ಬದ್ದಿ ಅವರು ಹಿಂದಿ ಚಿತ್ರಗಳಾದ ಆಶಿಕಿಯ ತೂ ಮೆರಿ ಜಿಂದಗಿ, ಕಟಿ ಪತಂಗ ಚಿತ್ರದ ಯೇ ಜೋ ಮಹಬ್ಬತ ಹೈ ಹಾಡುಗಳನ್ನು ಹಾಡಿ, ಜನರನ್ನು ಪ್ರೀತಿಯ ಸಿಂಧುವಿಗೆ ಕರೆದೊಯ್ದರು. ರೂಪಾ ಶೇಟ್ ಅವರು "ಬಿರುಗಾಳಿ" ಚಿತ್ರದ ಮಧುರಾ ಪಿಸುಮಾತಿಗೆ ಹಾಡು ಪ್ರಸ್ತುತಪಡಿಸಿದರು. ರವಿರಾಜ ಪ್ರಭು ಅವರು ಮರಾಠಿ ಅಬಂಗ್ ಹಾಡೊಂದನ್ನು ಹಾಡಿ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾದರು. ಅಕ್ಕ-ತಮ್ಮ ಗುರು ನಾಯ್ಕ ಮತ್ತು ಗೀತಾ ನಾಯ್ಕ ಅವರಿಂದ "ಗೀತಾ" ಚಿತ್ರದ ಜೊತೆ ಜೊತೆಯಲ್ಲಿ ಇರುವೆನು ಹಾಡು ನೆರೆದವರನ್ನು ಮಂತ್ರಮುಗ್ಧಗೊಳಿಸಿತು. ಶ್ರೀಪಾದ ಭಟ್ಟ ಅವರು ಯಾರೇ ನೀನು ರೋಜಾ ಹೂವೆ ಹಾಡಿನ ಮೂಲಕ ಅವರ ಅನುಭವ ಹಾಗೂ ಕಲಾತ್ಮಕತೆಯನ್ನು ತೋರಿಸಿದರು. 

 ಕಾರ್ಯಕ್ರಮದ ಆರಂಭದ ನಿರೂಪಣೆ ತುಸು ಎಳೆದಂತೆ ಕಾಣಿಸಿಕೊಂಡರೂ, ನಂತರದ ಭಾಗದಲ್ಲಿ ನಿರೂಪಕರಿಂದ ಹಾಡಲಾದ "ರವಿಚಂದ್ರನ್" ಚಿತ್ರದ ಹಾಡೊಂದು ಎಲ್ಲರ ಮನಗೆದ್ದಿತು. ನೃತ್ಯ ಗುರು ಅಮಯ ಅವರಿಂದ ಪ್ರಸ್ತುತಗೊಂಡ ನೃತ್ಯವೂ ಪ್ರೇಕ್ಷಕರಿಗೆ ವಿಶೇಷ ಅನುಭವ ನೀಡಿತು. 

   ಸ್ಥಳೀಯ ಕಲಾವಿದರು ತಮ್ಮ ಕಲೆಯ ಮೂಲಕ ಜನರ ಮನಸ್ಸಿಗೆ ಅಗಾಧ ನೆನಪು ಮೂಡಿಸಿದರು. ಯಲ್ಲಾಪುರದ ಬಹಳಷ್ಟು ಪ್ರೇಕ್ಷಕರು ತಮ್ಮ ಕೆಲಸ-ಕಾರ್ಯಗಳನ್ನು ಬಿಟ್ಟು, ಈ ಕಾರ್ಯಕ್ರಮವನ್ನು ವೀಕ್ಷಿಸಲು ಹಾಜರಾಗಿದ್ದರು. ಇದರಿಂದ ಸ್ಥಳೀಯ ವೃತ್ತಿಪರರಲ್ಲದ ಕಲಾವಿದರು ಕಲಾವಿದರಾಗಿ ತಮ್ಮ ಪ್ರತಿಭೆಯನ್ನು ಸ್ಫುಟಪಡಿಸಿದರು. 

 ಇತ್ತೀಚಿನ ವರ್ಷಗಳಲ್ಲಿ ಶಾಲಾ ಮತ್ತು ಕಾಲೇಜುಗಳ ವಾರ್ಷಿಕೋತ್ಸವಗಳಲ್ಲಿ, ಪ್ರತಿಭಾ ಕಾರಂಜಿಯಂತಹ ಮಕ್ಕಳ ಕಾರ್ಯಕ್ರಮಗಳನ್ನು ವೀಕ್ಷಿಸಲು ತಂದೆ-ತಾಯಿಗಳು ಹಾಗೂ ಕುಟುಂಬಸ್ಥರು, ನೆರೆ ಹೊರೆಯವರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸುತ್ತಿರುವುದು ಕಂಡುಬರುತ್ತಿದ್ದರೂ, ತಿಲಕ್ ಚೌಕದಲ್ಲಿ ನಡೆದ ಈ ಸಂಗೀತ ರಸಮಂಜರಿಯಲ್ಲಿ ನೆರೆದ ಜನರಿಂದಲೂ ಅದೇ ಉತ್ಸಾಹವು ಕಾಣಿಸಿತು. ಕಾರ್ಯಕ್ರಮದ ನಿರೂಪಣಾ ಭಾಗದಲ್ಲಿಯೂ ತಿಲಕ್ ಚೌಕ್ ಗಜಾನೋತ್ಸವ ಸಮಿತಿ ಅಧ್ಯಕ್ಷ ಬಾಲಕೃಷ್ಣ ನಾಯಕರ ಶೀಘ್ರ ಮತ್ತು ಚುರುಕಿನ ನಿರೂಪಣೆ ಶ್ರೋತ್ರುಗಳ ಮೆಚ್ಚುಗೆಗೆ ಪಾತ್ರವಾಯಿತು. 

  ತಿಲಕ್ ಚೌಕ್ ಗಜಾನೋತ್ಸವ ಸಮಿತಿಯ ಪ್ರಮುಖರಾದ ರವಿ ಶಾನಭಾಗ, ಶಿರೀಶ ಪ್ರಭು, ಸದಾನಂದ ಶಾನಭಾಗ, ಮಾಲತೇಶ ಗೌಳಿ, ಮಾಧವ ನಾಯಕ, ಸುಧಾಕರ ಪ್ರಭು, ಗಜಾನನ ನಾಯಕ, ಸಚಿನ್ ಕೇಕರೆ, ಕೃಷ್ಣಾ ನಾಯರ್, ರಜತ ಬದ್ದಿ, ನಮೀತಾ ಬೀಡಿಕರ್, ಭವ್ಯಾ ಬಾಲು ನಾಯಕ, ರಾಧಾ ಗುಡಿಗಾರ ಮತ್ತಿತರರು ಕಾರ್ಯಕ್ರಮ ಯಶಸ್ವಿಯಾಗಿ ನಡೆಯಲು ತಮ್ಮ ಪೂರ್ಣ ಸಹಕಾರ ನೀಡಿದರು.  

   ಕಾರ್ಯಕ್ರಮದ ಆರಂಭದಲ್ಲಿ ದಿ. ದರ್ಶನ್ ಬೀಡಿಕರ್ ಮತ್ತು ದಿ. ಯೋಗೇಶ ಹಿರೇಮಠ ಅವರ ಸ್ಮರಣಾರ್ಥ ಒಂದು ನಿಮಿಷ ಮೌನ ಆಚರಿಸಲಾಯಿತು.

.

.

.